تەکنەلۆجیا بۆ ئاشتی
ڕاستی ئەو ڤیدیۆیە چییە کە بڵاوکراوەتەوە گوایە گیان لەدەستدانی گەنجێکی عێراقی بە جەڵتەی دڵی کتوپڕ لەکاتی وەرزشکردن لەناو هۆڵێکی وەرزشیدا نیشان دەدات؟
لە تۆڕە کۆمەڵایەتییەکاندا ڤیدیۆیەک بڵاوکراوەتەوە لەگەڵ دەقێکدا کە دەڵێت "لە هۆڵی وەرزش ئەم گەنجە گیان لەدەست دەدات، ڕووداوەکە لە بەغدا بووە".
ڕاستییەکە
ئەو ڤیدیۆیەی کە بڵاوکراوەتەوە و بانگەشەی ئەوە دەکات کە گیان لەدەستدانی گەنجێکی عێراقی بە جەڵتەی دڵی کتوپڕ لەکاتی وەرزشکردن لەناو هۆڵێکی وەرزشیدا نیشاندەدات، نادروستە، دەرکەوت کە ئەو ڤیدیۆیە دەگەڕێتەوە بۆ کشمیر لە هیندستان.
ڤیدیۆکەمان پشتڕاستکردەوە بە ئەنجامدانی گەڕانی پێچەوانە بۆ چەند گرتەیەک لە ڤیدیۆکە، دەرکەوت کە لەلایەن بەکارهێنەرانی تۆڕە کۆمەڵایەتییەکانەوە لە مانگی نیسانی 2026 بڵاوکراوەتەوە، کە کەسێک بە ناوی “ئیمتیاز ئەحمەد وانی” لە شاری شەری شەریف، بودگام (ناحیەی سرینەگار) لە کشمیری هیندستان پیشاندەدات، کە لە 17ی نیسانی 2026 لەکاتی وەرزشکردندا گیان لە دەست دەدات.
بەگوێرەی زانیارییەکان، ئیمتیاز لەکاتی وەرزشکردندا تووشی وەستانی دڵ بووە و لە گرتە ڤیدیۆییەکەدا ئەو ساتە دەردەکەوێت کە لە یەکێک لە ئامێرەکان هەڵدەستێت پێش ئەوەی بکەوێتە خوارەوە و بکەوێتە سەر زەوی.
ناوبەناو ژمارەیەک هەواڵی ساختە بە درۆ دەگەڕێنرێنەوە بۆ عێراق، بە ئامانجی وروژاندنی مشتومڕ یان چەواشەکردنی ڕای گشتی.
نموونەی ئەم پۆستانەش، ڤیدیۆیەک کە گوایە وانەی یۆگا لە سلێمانی نیشاندەدات، بەڵام دوای پشتڕاستکردنەوە دەرکەوت کە ئەو بانگەشەیە ساختەیە.
گرتەیەکی دیکە بڵاوبووەوە کە گوایە تیمساح لە شاری ناسریە لە پارێزگای زی قار نیشان دەدات، بەڵام لێکۆڵینەوەکان سەلماندیان کە ئەم بانگەشەیە ساختەیە.
