تەکنەلۆجیا بۆ ئاشتی
ڕاستی هەواڵی ڕاگەیاندنی حکومەتی عێراق بۆ ڕاگرتنی گەشتی فڕۆکەوانی لەگەڵ ئێران، لە سێشەممەی داهاتووەوە چییە؟
لە تۆڕە کۆمەڵایەتییەکاندا هەواڵێک بڵاوکراوەتەوە کە دەڵێت "حکومه تی عێراق بڕیاری هه ڵوه شاندنه وه و ڕاگرتنی سه ڕجه م گه شته ئاسمانییه کانی بۆ کۆماری ئیسلامی ئێران و له سەرجەم فرۆکەخانە کانی عێراق ده دات".
ڕاستییەکە
ئەو هەواڵەی کە باس لە ڕاگرتنی گەشتی فڕۆکەکان لەنێوان عێراق و ئێران لە سێشەممەی داهاتووەوە دەکات، هەواڵێکی ساختەیە، هیچ سەرچاوەیەکی فەرمی تا ئێستا ڕاگەیاندنێکی لەم جۆرەی بڵاونەکردوەتەوە.
لە کاتی گەڕان بۆ پشتڕاستکردنەوەی ئەو هەواڵە بە بەکارهێنانی وشە سەرەکییەکان لە وێبگەڕەکانی گەڕان، هیچ سەرچاوەیەکی باوەڕپێکراومان نەدۆزییەوە کە پشتگیری لەم بانگەشەیە بکات، لە هەمان کاتدا، هیچ هەواڵێک سەبارەت بەو بانگەشانە لە هەژمارە فەرمییەکانی حکومەتی عێراق، وەزارەتی گواستنەوە یان دەسەڵاتی فڕۆکەوانی مەدەنی عێراق لە تۆڕە کۆمەڵایەتییەکان بڵاو نەکراوەتەوە. هەروەها، هیچ دەزگایەکی ڕاگەیاندنی ناوخۆیی، چ فەرمی و چ نافەرمی، ئەم هەواڵەی بڵاو نەکردووەتەوە.
لە لایەکی دیکەوە، ڕێکخراوی فڕۆکەوانی مەدەنیی ئێران ڕۆژی یەکشەممە، 20ی ئەیلوولی 2026، هەواڵە بڵاوکراوەکان سەبارەت بە هەڵوەشاندنەوەی گەشتی فڕۆکەوانی لەنێوان عێراق و ئێران، کە دەگوترا لە سێشەممەوە جێبەجێ دەکرێت، ڕەتکردەوە و جەختی کردەوە کە هیچ ڕاگەیاندنێکی فەرمی لەم بارەیەوە نەکراوە.
ئاژانسی "مهر"ی ئێران بە وتەی مەجید ئەخوان، وتەبێژی ڕێکخراوی فڕۆکەوانی مەدەنی، ڕایگەیاندووە کە "ئەو هەواڵەی سەبارەت بە هەڵوەشاندنەوەی هەموو گەشتە فڕۆکەوانییەکان لەنێوان دوو وڵاتەکە بڵاوکراوەتەوە، پشت بە هیچ پشتڕاستکردنەوەیەکی فەرمی نابەستێت"، هەروەها ئاماژەی بەوە کردووە کە هیچ ڕاگەیاندنێک لەلایەن دەسەڵاتە پەیوەندیدارەکانی عێراقەوە سەبارەت بە ڕاگرتنی گەشتەکان نەکراوە.
