تەکنەلۆجیا بۆ ئاشتی
ڕاستی ئەو ڤیدیۆیە چییە کە بڵاوکراوەتەوە گوایە خۆپیشاندانی فەرمانبەران لە بەغدا پیشان دەدات بەهۆی دواکەوتنی مووچەکانیان بۆ ماوەی 10 ڕۆژ؟
لە تۆڕە کۆمەڵایەتییەکاندا ڤیدیۆیەک بڵاوکراوەتەوە لەگەڵ دەقێکدا کە دەڵێت "خۆپێشاندانی فەرمانبەران ومووچخۆرانی بەغدا کە ماوەی 10 ڕۆژە مووچەکانیان دواکەوتووە".
ڕاستییەکە
ئەو ڤیدیۆیەی لە تۆڕە کۆمەڵایەتییەکاندا بڵاوکراوەتەوە و بانگەشەی ئەوەی دەکات کە خۆپیشاندانی فەرمانبەران و مووچەخۆران لە بەغدا نیشان دەدات، بەهۆی دواخستنی مووچەکانیان بۆ ماوەی 10 ڕۆژ، چەواشەکارانەیە. بەوپێیەی دوای پشکنین دەرکەوت کە ئەم ڤیدیۆیە بۆ ساڵی 2023 دەگەڕێتەوە و خۆپیشاندانێک نیشاندەدات کە لەو کاتەدا بۆ پشتگیری لە فەلەستین ڕێکخرابوو، و هیچ پەیوەندییەکی بە خۆپیشاندانەکانی ئێستا یان بابەتی دواخستنی دابەشکردنی مووچەوە نییە.
گەڕانی پێچەوانەمان ئەنجامدا بۆ چەند گرتەیەک لە ڤیدیۆکە، دەرکەوت کە لەلایەن هەژمارێکی تیک تۆک لە بەرواری 13ی تشرینی یەکەمی 2023 بڵاوکراوەتەوە، ڤیدیۆکە خۆپیشاندانێکی میلیۆنی نیشان دەدات کە لەو کاتەدا لە ناوەندی بەغدا، لە مەیدانی تەحریر، بۆ پشتگیری لە فەلەستین ڕێکخرابوو.
دووبارە بڵاوکردنەوەی ئەم ڤیدیۆیە هاوکاتە لەگەڵ خۆپیشاندانە فراوانەکانی بەغدا، کە لە دژی دواکەوتنی دابەشکردنی مووچەی مانگانەیان، خۆپیشاندەران داوایان لە حکومەت کرد بە خێرایی چارەسەری کێشە داراییەکانیان بکەن.
ئەم خۆپیشاندانانە لە کاتێکدا ڕوویاندا کە هێشتا پێنج وەزارەت، لەگەڵ سێ سەرۆکایەتییەکە و ژمارەیەک لە دەزگا حکومییەکان، چاوەڕوانی دابەشکردنی مووچەی مانگی تەممووزی 2026ن، ئەمەش بووەتە هۆی دروستبوونی ناڕەزایەتی بەرچاو لەنێو فەرمانبەران و ڕای گشتی.
لە بەرامبەردا، فالح ساری، وەزیری دارایی، لە ڕێکەوتی 3ی ئابی 2026 داواکارییەکی فەرمی ئاراستەی سەرۆکایەتی ئەنجومەنی نوێنەرانی عێراق کرد، بۆ ئەوەی لە نزیکترین دانیشتنی پەرلەماندا میوانداری بکرێت، بە مەبەستی خستنەڕووی دۆخی دارایی و ئابووریی وڵات و ڕوونکردنەوەی گرنگترین ئەو ئالەنگارییانەی کە لە ژێر کاریگەری گۆڕانکارییە هەرێمایەتییەکانی ئێستادا ڕووبەڕووی دارایی گشتی بوونەتەوە.
وەزیرەکە جەختی کردەوە کە ئەم داواکارییە بۆ میواندارییە لە پەرۆشی وەزارەتەوە سەرچاوە دەگرێت کە وێنەیەکی وردی واقیعی دارایی و ئابووری پێشکەش بە نوێنەرانی خەڵک بکات، هەروەها ئەو ڕێوشوێنانەی کە دەیگرێتەبەر بۆ دڵنیابوون لە جێبەجێکردنی ئەرکە سەرەتاییەکانی دەوڵەت، و بەردەوامبوون لە جێبەجێکردنی بەرنامەکانی چاکسازی دارایی و کارگێڕی.
